मूल्यका लागि सपना

घुम्न छोडेको साइकलको डाइनामो र मन
उस्तै उस्तै लाग्छन्
अध्यारोमा साइकल जस्तै गुडिरहेछ जीवन

क्रान्तिपछिको विहान्
अखवारमा छापिएछ
विजय जुलुसमा आफ्नो तस्विरसँगै
फेरि तरकारीको भाऊ †
फेरि तेलको भाऊ †
फेरि नूनको भाऊ †
साकाहारी भएर पनि तर्सन्छु †
खसीको मासुको भाऊ †
आकासिएछ क्रान्तिसँगै ।

क्रान्तिपपछिको दिउँसो
विजय जुलुस निस्किएछ
फेरि पनि बाटो छोड्दैनन् साइकललाई
घुम्न छाडेको डाइनामो जस्तै मनलाई
प्राइभेट गाडीहरु †
प्राइभेट सडकहरु †
प्राइभेट सहरहरु †
प्राइभेट बजारहरु †
प्राइभेट सुपरमार्केटहरु †
प्राइभेट जीवनहरु †
प्राइभेट सपनाहरु खेदिरहेछन् मलाई
मेरो सपनालाई
म जस्ता अरु धेरैका सपनालाई ।
क्रान्तिपछिको दिनमा पनि...

क्रान्तिपछिको साँझ मातेको छ सहर
मातेका छन् नेताहरु
मातेका छौं हामी
साँझ सडकमा वत्ती निभेका छन्
निभाइएका छन्
डाइनामो वेगरका जीवनहरु
स्पोक भाँचिएका सपनाहरु
गइरहेछन् एक हुल खसी बजार तिर...
अब सपनाहरु बिक्री हुन्छन् थोकको भाउमा
क्रान्तिपछिको साँझमा पनि...


आफ्नो मूल्यका लागि सपना
वा मूल्यका विरुद्धमा सपना
क्रान्तिका लागि तत्पर छ ।